Early Works

Në një mënyrë alegorike “Early Works” rikujton historinë e të rinjve që morën pjesë në demonstratat studentore në qershor 1968 në Beograd. Tre djem dhe një vajzë, Yugoslava, kundërshtojnë rutinën borgjeze të jetës së përditshme. Duke dëshiruar “të ndryshojnë botën”, të frymëzuar nga shkrimet e të riut Karl Marks, ata shkojnë në fshat e në fabrika për të “zgjuar ndërgjegjen e njerëzve”, për ti inkurajuar ata që të luftojnë për emancipim dhe jetesë të dinjitetshme. Në terren ata përballen me primitivizëm dhe varfëri, por edhe ata shfaqin limitet e tyre, dobësitë, pamundësinë dhe xhelozinë. Ata arrestohen. Të frustruar për shkak se nuk u realizua revolucioni i tyre, tre të rinjtë vendosin ta eliminojnë Yugoslavën, e cila është dëshmitare e paaftësisë së tyre. Ata e qëllojnë atë, e mbulojnë me flamurin e partisë, i djegin trupin dhe një kolonë e errët tymi që shkon drejt qiellit është e vetmja gjë që mbetet nga revolucioni i synuar.